Իրանի միակ մտահոգությունը միջանցքն է: Իրանցի վերլուծաբաններն ասում են՝ որ դա Իրանի համար աշխարհքաղաքական մեծ աղետ կլինի
Տիկին Բեգիջանյան, ՌԴ ԱԳՆ հայտարարում է, որ ՌԴ-ն աջակցում է 3+3 ձեւաչափի անհրաժեշտության մասին, որի մեջ ներառված են Հարավային Կովկասի երեք երկրները, Թուրքիան, Ռուսաստանը եւ Իրանը: մենք գիտենք, որ Մոսկվայում Իրանի ԱԳ նախարարի հետ եւս այս հարցը քննարկվել է: Ի՞նչ դիրքորոշում ունի Իրանը:
3+3-ը նոր գաղափար չէ, տարիների պատմություն ունի։ Ընդ որում, Թուրքիան դրա տակ մի բան էր հասկանում, Իրանը մեկ ուրիշ տարբերակ էր առաջ քաշում: Սա, ըստ էության, Իրանի առաջարկած տարբերակն է: Թուրքիան ասում էր, որ այս ձեաչափի մի կողմում Թուրքիան, Ադրբեջանը եւ Ռուսաստանն են, մյուս կողմում Հայաստանը, Վրաստանն ու Իրանը: Իսկ Իրանն առաջարկում էր մի կողմում լինեն Հարավային Կովկասի երեք երկրները, մյուս երեքը՝ Ռուսաստանը, Թուրքիան եւ Իրանը: Հիմա Ռուսաստանը հենց այս երկրորդ տարբերակն է առաջարկում, այսինքն Իրանի առաջարկածը: Պատերազմից անմիջապես առաջ այս տարբերակը Իրանն առաջարկել էր: Հիմա, փաստորեն, Վրաստանը այս տարբերակին բացասական պատասխան է տվել: Եթե Իրանը կողմ է, դա նշանակում է, որ Սյունիքով միջանցքի հարցը օրակարգում չի լինի: Եթե լինի, ուրեմն Իրանը դրան դեմ կլինի եւ դա չի ստացվի: Այդ առումով դա դրական է, բայց մնացած առումներով ես չեմ կարող ասել: Իրանի միակ մտահոգությունը միջանցքն է: Իրանցի վերլուծաբաններն ասում են՝ Աստված մի արասցե, նման բան լինի, որովհետեւ դա Իրանի համար աշխարհքաղաքական մեծ աղետ է: Նրանք նույնիսկ ասում են՝ դա նույնիսկ ավելի մեծ աղետ է, քան Գյուլիստանի ու Թուրքմենչայի պայմանագրերը, որը նրանք համարում են իրենց պատմության խայտառակությունը: Ու եթե Իրանը համաձայնի 3+3-ին, նշանակում է միջանցք չի լինելու:
Այսինքն կարծում եք՝ Իրանը երաշխիքնե՞ր է ստացել, որ միջանցք չի լինելու, որ համաձայնի 3+3-ին:
Ոչ մեկը ոչինչ չի ասել, բայց ընդհանուր զարգացումներից դա երեւում է: Այն, որ Իրանն այդ թեմայով այլեւս մտահոգություններ չի հայտնում, դա արդեն իչ-որ բանի մասին խոսում է: Իրան-Ադրբեջան լարվածությունը թեեւ թուլացել է, բայց բոլոր դեպքերում, մամուլի մակարդակով պայքարը գնում է, մեկը մյուսին մեղադրելով, անգամ Թալիշստանի ակտիվիստներն են բավական աշխուժացել:
ՍԻՐԱՆՈՒՅՇ ՊԱՊՅԱՆ, Հարցազրուցավար
lragir.am